Punjabi Poetry
Punjabi
رمکے رمکے کھاندی دکھ دی سینوک جندڑی نوں
وت لے ڈُبدے نیں کجھ سوڑاں آلھک جندڑی نوں
لوڑاں غرضاں وی کجھ پی جاون خون پسینہ
لا چھڈ دے نیں کجھ کم کاج تروٹک جندڑی نوں
عمر تمامی فِر دھبّے دھوندیاں وی نئیں دُھپدے
اک واری لگ جاوے جے کر کالک جندڑی نوں
سچ کہہ گئے لوک سیانے امید تے دنیا قائم
ہمّت دیون آس دلاون بالک جندڑی نوں
ایڈی وی کیہڑی ایتھے بھاجھڑ پئی اے تینوں
سکھ دا ساہ کدے لیون دے انتھک جندڑی نوں
پل پل بہروپ بناندی دم دم سانگ وٹاندی
لے بیٹھے نیں ایہہ جندڑی دے ناٹک جندڑی نوں
ہر کوئی ڈر کے منہ تے ڈبُّو چاہڑی پِھر دا
کر دی پئی ہڑپ کرونے دی سوتک جندڑی نوں
تان بجائے اے ڈھیٹھاں وانگر پِھر دی ٹُر دی
لا کے جندڑی آپے روگ بھیانک جندڑی نوں
ٹوہندی نظراں نال مُنیرؔ ایہہ پھوک کیرکھدی پیر
ہورے کیہڑا پے گیا اے جگ تے شک جندڑی نوں
مُنیر طُورؔ
0 Comments